Über üs

D' Gaschtgäber

Mir si d‘Marina Roncagalli u dr Lorenz Schwab u wohne z‘Niederried bei Kallnach mit üsem 11jährige Sohn Elia unärä Chatz.

Marina: I bi imene Restaurant ufgwachse, ha aber nach dr Schueu im Druckgwärb ä Lehr aus Typographin gmacht. Bis i Muetter worde bi, hani i Druckereie, imene Wärbebüro u im Gastgwärb im Service gschaffet. Mini Vorliebi de Lüt Guets z‘tue hani aus Letschts bir SPITEX im Mahlzeitendienst chönne umsetzä.

Lorenz: I bi z‘Niederried ir Gärtnerei ufgwachse u ha ä Lehr aus Gärtner gmacht. I bi aber scho immer gärn ir Chuchi am Herd gstange, für mini Familie u Fründe z‘bechoche. Iz chani mini Lideschaft nid nume aus Hobby usläbe.

Nachdäm i (Marina) im 2015 d‘Wirteprüefig gmacht ha, chöi mir üs mit dr «Aute Chäsi» üse Troum vomene Gastgwärb verwürkleche. Mir wei Lüt mit Läckereie inere gmüetleche Atmosphäre verwöhne, wo si sech wohl füehle u gärn verwyle.